वैचारिक दिवाळखोरी

   एखाद्या गोष्टीची सत्यता जाणून न घेता चुकीच्या ऐकीव माहितीवरून एखाद्याच्या वैयक्तिक, सामाजिक, कौटुंबिक आयुष्याबद्दल वाईट माहिती पसरवण्याचे पातक करणारी माणसे वैचारिक दिवाळखोर तर असतातच, परंतु त्याचबरोबर स्वतःच्या प्रगतीचा विचार करण्यापेक्षा दुसऱ्याच्या अधोगतीची कामना करणारेदेखील असतात.

   त्यांचे हे कर्म एक दिवस फिरून त्यांच्याकडेच आल्याशिवाय राहत नाही.

   वेळ सर्वांना अनुभूती देत असते.

   त्यामुळे,

आयुष्य एकदाच मिळते, दुसऱ्याची खोटी बदनामी पसरवणे व निंदा करणे यात आयुष्य वाया घालवण्यापेक्षा स्वतःच्या व स्वतःच्या कुटुंबियांच्या वैचारिक प्रगल्भतेकडे लक्ष दिल्यास या पृथ्वीवर जन्म मिळाल्याचे सार्थक होईल.

   अन्यथा एखाद्या कॅन्सरमध्ये आणि आपल्यात काही फरक राहणार नाही. जो गरज नसताना निर्माण झाला व इतरांचे आयुष्य संपवत गेला....

✒️ K. Satish

शब्दांच्या शस्त्राची धार

   बोलताना शब्दांचा अतिशय विचारपूर्वक वापर केला पाहिजे. 

शब्दांच्या शस्त्राला इतकी धार असते की, त्याने केलेल्या वारांची जखम सहजासहजी भरून निघत नाही. आणि भरून निघालीच तरी ती अधूनमधून चिघळत राहतेच. 

✒️ K. Satish

 

 

 

आदर

लोक आपल्याला केवळ दोन कारणांसाठी

आदर , मानसन्मान देतात...

एकतर आपल्याकडे पैसा , सत्ता,  ताकद असेल तर..

अथवा....

आपल्याकडे इतरांना मनापासून मदत करण्याची प्रवृत्ती असेल तर...

पहिल्या प्रकारचा आदर हा तात्पुरत्या स्वरूपाचा असतो...

परंतु , दुसर्‍या प्रकारातील आदर हा कायमस्वरूपीचा आणि चिरकाल टिकून राहणारा असतो...

✒ K. Satish

खरा अपराध

आयुष्याच्या वाटेवर मार्गक्रमण करीत असताना रस्ता चुकणे हा अपराध नव्हे. 

परंतु ,

चूक कळल्यानंतरही योग्य मार्गाची निवड न करता चुकीच्या वाटेवर जाऊन मध्येच थांबणे हा नक्कीच अपराध आहे.

✒ K.Satish

छटा आयुष्याच्या

आयुष्याच्या छटा निराळ्या

थक्क झालो मी पाहता पाहता,

निरनिराळे सूर उमगले

जीवनगाणे गाता गाता

✒ K. Satish

लपवू शके सूर्यास न कोणी

   सूर्याला आणि त्याच्या प्रकाशाला कितीही झाकण्याचा प्रयत्न केला तरीही तुम्ही त्याला झाकू शकत नाही. फार फार तर तुम्ही तुमचे डोळे बंद केल्यास अथवा डोळ्यासमोर हात धरल्यास तो काही काळापुरता तुमच्यासाठी झाकला जाईल.

   परंतु , जास्त काळ तुम्ही त्याचा तिरस्कार करून त्याचे महत्त्व कमी करू शकत नाही. उलट अशा कृतीमुळे तुम्ही तुमचेच नुकसान करून बसता.

   सूर्य मात्र स्वतः प्रकाशित राहून इतरांना प्रकाशमय करण्याचे त्याचे कार्य आजतागायत करत आलाय आणि इथून पुढेदेखील करत राहील. अगदी त्याच्या अंतापर्यंत.

आणि सूर्याच्या याच गुणाचा आदर्श घेऊन अखेरच्या श्वासापर्यंत जगणे मला पसंत आहे.

✒  K.Satish

वाढदिवस म्हणजे काय ?

वाढदिवस म्हणजे काय?

आपण ह्या पृथ्वीतलावर जन्म घेतलेल्या दिवसाची आठवण...

आपल्या अस्तित्वाने प्रफुल्लित होणाऱ्या लोकांकडून व्यक्त होणार्‍या प्रेमरूपी सागरात डुंबणे...

जीवनयात्रेत पुढे पुढे मार्गक्रमण करताना दिवसागणिक आलेल्या अनुभवांच्या वृद्धिंगत झालेल्या साठ्यामुळे आपल्या परिपक्वतेत वाढ झाल्याचा अनुभव...

आयुष्यामध्ये आपल्या सुस्वभावामुळे, सहकार्याच्या भुमिकेमुळे, मधुर वाणीमुळे, बुद्धीचातुर्यामुळे, आणि चांगल्या कर्तृत्वाच्या जोरावर ज्यांच्या ज्यांच्या हृदयामध्ये आपल्यासाठी छोटीशी जागा निर्माण करण्यात यश आले असेल त्या सर्वांकडून प्रेमभावनेतून मिळालेल्या शुभेच्छांचा स्वीकार करणे...

✒ K. Satish